絲絲講場：海爾起咗百四間希望小學

企業要做得成功，唔單止要交出見得人嘅成績表，仲要為社會發展肩負起一份承擔。海爾集團總裁楊綿綿尋日喺一個論壇上，就畀海外嚟參與活動嘅嘉賓問到：中國公司喺呢方面做成點。作為內地知名企業領導，楊總又點會畀呢啲問題考起，佢即刻打趣話正常交稅同環境保護一直做足之外，亦興建咗超過140間希望小學。

楊總話海爾集團一直參與好多唔同嘅公益事業：除咗參與青島甚至山東省嘅公益活動之外，仲興建咗超過140間希望小學，希望幫更多家境貧困嘅小朋友，令佢哋有接受教育嘅機會。絲絲覺得，興建希望小學其實都幾符合海爾嘅「不斷創造美好家居生活」理念。

楊總又話集團唔只單係賣產品，而係推廣方案，集團其實係一個方案解決商；佢仲話為咗配合依家網絡化嘅普及，集團會整合全世界最好嘅資源，透過網絡最快送到客戶手上。

近期，海爾集團頻頻有新動作，早前向新西蘭家電品牌Fisher & Paykel Appliances以每股1.28新西蘭元提出全購，早兩日國家發展委網站就公布，已經喺10月批准咗公司呢個行動。尋日佢哋子公司海爾電器（01169）收報11.36元，升7.37%，股價創埋一年新高添。