絲絲講場：趙樓神E-Card 玩Psy Style
聖誕臨近，絲絲收到唔少E-Card，尋日收到長實（00001）嗰張，中間有個型男擺晒騎馬舞post，絲絲一眼就認得出係長實執董趙國雄化身喇，佢一身Psy造型，嚟番part《Gangnam Style》嘅變奏版《Cheung Kong Style》，樓神真係IN到爆。
「趙樓神」每次出嚟推樓盤，好多花臣，最經典係唐裝look、大將軍、中東油王、蝙蝠俠、甚至抱埋個古箏扮楚留香咁出嚟，總之每次都先聲奪人，謀殺鎂光燈；絲絲仲記得當年沙士過後，佢曾經一身白袍醫生look出嚟谷盤，貼市得佢呢，佩服。
跳埋「騎馬舞」更完美
佢今次玩嘅呢個黑超老西look，好明顯食正最近紅遍全球嘅南韓阿叔Psy嘅《Gangnam Style》風；Psy呢幾日旋風式襲港澳，聽講佢出場幾分鐘show兩手招牌「騎馬舞」，就袋走幾百萬元；連美國《時代》周刊都將佢擺埋喺年度風雲人物選舉當中，入圍同奧巴馬拗手瓜。紅成咁，難怪早排連恒地（00012）同新世界（00017）合作發展嗰個元朗新盤尚悅，都請咗阮兆祥嚟《尚悅Style》一輪。
「趙樓神」點睇都fit過凸腩嘅Psy，佢下次會唔會露兩手跳番part《Cheung Kong Style》嘅「騎馬舞」呢？