Market Insight：中興通訊打翻身戰

人話女人心海底針，但A股投資者心事比女士更難測，一堆實實在在揭示到經濟轉向的數據視而不見，反而，揀中央政治局會議，延續穩物價、控樓價的政策的陳腔舊調，當執到金一樣興奮，昨日滬深兩市再現賓虛場面，勁升2.9%及3.7%，成交額差不多是周二的一倍。

不過，也總算教早前估滬綜指跌到1,960點，下降軌道底部已經差不多的古勝鬆一口氣。技術上，滬綜指最低限度應升至通道頂阻力，大約在2,100點附近。

追滙控有心未算遲

A股轉勢，熱錢充裕的港股，一舉升穿多個即市阻力，幾乎由頭挾到尾，恒指升470點報22,270點，創今年高位，期指高水70點收報22,340點，係十二月期指轉倉後首次，主板成交947億元創近九個月新高。

放大圖片

放大圖片

火車頭滙控（00005）預備明年出售毒資產外，亦搵到泰國卜蜂集團承接手上15.57%平保（02318）H股股份，基本上，交易即時消除配股批散出街的風險，對平保屬好事，對積極削減非核心投資的滙控，一鋪攞番727億元，做靚份資產負債表迎接《巴塞三》協定，絕對是一石二鳥。昨日股價升到一年新高，但輕身上路，加埋一三年預期股息近6厘，即使今日至追，睇嚟仲未算遲。

近十年，科網及太陽能概念股曾經炒得有幾勁，有番咁上下股齡的股民都會知，概念股吸引的地方，係無基本因素唔緊要，只要齊齊抱住「今日唔賺，將來好賺」心態，樂觀情緒也可無限放大。

頁岩概念先炒為敬

頁岩氣會唔會係下一個股市當炒概念炒鑊勁？真係愈睇愈有咁嘅趨勢，尤其市面選擇唔多，剛推介的山東墨龍（00568）昨日火燒冷灶大升一成三，連勝利管道（01080）及珠江鋼管（01938）都沾上概念成分，都突然炒起，總之大家緊記，炒概念股記緊要懂得睇風頭火勢，並緊記定止蝕。

港股雞犬皆升，要搵穩陣兼未開車對象唔易，今年電訊設備股大落後，一來內地3G投資高峰期將過，其次係華為早輪想到美國上市，隨即被美國國會指責華為、中興通訊（00763）兩大巨頭，威脅美國安全，時間之巧合，難怪陰謀論都認定，美國不想中國電訊設備公司坐大，擴大出口，方以出口術形式打壓。

中興股價今年累積跌51%，輸大市一大截，現價市帳率1.33倍，對比1.2至4.7倍歷史區間，接近下限，不利因素應反映得八八九九。

昨日中興成交大增下，股價抽升5%，事緣中興同國家開發銀行簽署《開發性金融戰略合作協議》，提供200億美元（1,560億港元）合作額度，突然獲批巨額融資，唔少人聯想到盛傳內地加快4G投資，扶持電訊設備產業的傳聞並非空穴來風，暫時雖然係估估吓，但最壞都已經反映，中興應該係贏面大，輸面細的選擇。

海爾球場大易踢上

大市氣氛良好，唔少板塊都蠢蠢欲動，好似家電股海爾電器（01169），昨日一支大陽燭踢到上全日高位11.5元，收報11.36元，升7.3%，成交額9,462萬元；海信科龍（00921）及TCL多媒體（01070）分別升4.6及3.9%；創維數碼（00751）則升2%。

其實咁多隻家電股，論交投係隻創維最好炒，估值亦算係平，但偏偏呢隻股表現都幾難觸摸，普通散戶跟炒要贏佢錢並唔容易，反而海爾較多基金坐貨，平日唔聲唔聲，一開車班大戶就掃到甩轆，短線回吐守穩11元樓上，博佢來多支陽燭衝穿12元。

古勝