絲絲講場：彤叔辭任 周大福非執董
87歲嘅鄭裕彤近年不斷將工作下放畀個仔同孫，尋日佢就透過周大福（01929）嘅通告公布，辭任周大福嘅非執行董事職位，十二月一日起生效。若連同今年三月辭任新世界發展（00017）主席兼執行董事，彤叔可以話差唔多喺新世界系上市公司「裸退」落嚟。
彤叔雖然係地產大亨，但佢其實係去到七○年代先至搞地產生意，反而珠寶首飾生意呢瓣，彤叔就有成70幾年嘅深厚經驗。早喺一九三八年佢由內地走去澳門，就係喺周大福金舖做學徒，之後仲娶埋老闆位千金周翠英添。
舊年周大福上市，彤叔好多嘢都親力親為，好多人都覺得周大福嘅地位，有如佢親生仔咁。佢今次辭任非執董，相信難免百般滋味在心頭。
退任決定無關入院
咁啱尋日絲絲碰到彤叔位公子鄭家純，當然向佢問多句。純官就話，彤叔早喺今年四、五月時，即係佢入院之前，就已經決定退任，同入院無關。佢又話彤叔因為覺得自己年紀大，參加繁多嘅董事會會議會好吃力，所以先至有退落嚟嘅決定。咁彤叔精神點？純官話彤叔目前健康好好，多謝大家嘅關心咁話。
始終都係情難捨，彤叔會留任周大福名譽主席。而佢依家仍然係澳博（00880）同信德（00242）嘅非執董，以及萬邦（00158）嘅執董，不過呢啲都唔係佢直系嘅生意。絲絲喺度祝願彤叔快快康復，希望可以早日喺公開場合見到佢。
余詩韻