絲絲講場:郭樹清開腔股民嗌救命

近排滬深股市連創新低,2,000點大底都穿埋,內地小股民損手爛腳之餘,對中證監嘅怨氣都直線上升。身為中證監揸fit人嘅郭樹清尋晚定咗行程,要出席財經年會發表講話,消息一出,就有小股民喺微博呼籲主席「唔好再提股市喇」。

1976震完 怕見1942

事關郭主席今年出咗咁多政策,完全止唔到股市下跌,A股尋日啱啱先重溫完馮小剛嘅《唐山大地震(1976)》,好驚郭主席今日又要帶大家去睇《1942》。

郭主席早前曾經公開話過「監管機構需要對股市下跌承擔一定嘅責任」,仲承諾繼續穩定股市預期,不過呢番表態完全安撫唔到股民嘅怨氣。有股民話早就對郭樹清嘅政策講話麻木咗,更加有人對會議主辦方給予「溫馨提示」,喺主席出場時「要做好會議安保工作」。

避談股市轉講經濟

有財經評論員話,郭主席不如唔好講嘢,唱歌好過喇,呢幾日大家已經由《相約1998》唱到《戀曲1990》再到《戀曲1980》,話唔埋聽日仲要去睇《1942》。

唔知係咪聽到股民嘅呼籲,郭主席尋晚演講完全避開股市,主要發表對經濟綜合改革嘅意見,仲特別建議將30至50%嘅國有資產劃撥畀社保基金。其實計絲絲話,大家公平啲好喎,內地股市今日嘅困局,點只關郭樹清一個嘅事,中證監嘅工作係提供建立公平交易嘅制度環境,個市嘅升跌,點叫監管部門保證呢又?