牛熊輪流炒：中移續領風騷 買21217
外圍跌，A股再向下尋底，港股肯定難發圍，昨日恒指甫開市見21,764點，已是全日高位，最低挫至21,629點，6隻恒指熊證打靶，全是昨日新上市熊證，無街貨要收。
值得一睇的是昨日A股收市後，港股由低位反彈幾十點，十二月期指報21,718點，續較現貨高水，要話大市轉入中型調整市又似乎言之尚早。從恒指輪及牛熊證的坐倉情況，發現好淡兩倉同時流入資金，分別是2,557萬元及1,487萬元，牛熊證街貨前日均有所增加，數量相當於789張及358張對沖期指，反映市場對後市無乜方向。
A50料反覆尋底
A股咁跌法，跌到大家都麻木，安碩A50中國（02823）連現三支大陰燭，若然守唔住9.4元，下個支持位睇9元。
A股走勢真係令人大跌眼鏡，今年唔少大行都話A股抵買，同時間唔少A股ETF推出，仲要係實物，較A50這隻合成ETF有其優勝之處，起碼少啲對手風險。
華夏滬深三百（03188）是雙幣買賣的實物ETF，今年七月成立，追縱滬深300指數，相關輪證成交突出，昨日達3.08億元，是第五大成交個股輪，買得到的輪證只有17隻咁多，全部係Call。
有消息指內地的4G網絡最快明年中正式批出，若然屬實，中國移動（00941）繼續做大哥，股價昨日收報87.5元，微升0.05元，對手中電信（00728）以及中國聯通（00762）分別跌0.2%及2.1%，睇好的可考慮中移荷合購（21217），明年四月二十二日到期，行使價92.05元，實際槓桿9.9倍。
Handsome哥