Market Insight：互太紡織啱好息族

要勸有心尋死的人回頭，可能仲比較容易，要極端悲觀投資者改觀，確唔係一時三刻可成，早前中國製造業採購經理指數（PMI）回到50盛衰線樓上，到今次官方企業利潤數據，仲未足夠令內地淡友改觀，昨日滬綜指改寫四年新低位，跌17點報1,973點。

技術上，即市低點1,968點已極接近八月開展下降軌道底部1,965點，9日RSI也去到26的超賣水平，點解應彈又唔彈？誰也說不準。再睇今年五月恒生AH溢價指數高位曾經去過120.68，前日最低落到95.5，九月H股跑贏A股，加權平均計算，顯示刻下H股已經比A股貴，代表較多國際投資者參與的H股實在睇得太過好，抑或係內地A股參與者睇得太悲？

放大圖片

放大圖片

年底恒指略為看好

恒指連跌三日，昨跌135點報21,708點，主板成交縮減至467億元，十一月期指今日結算，先殺好友，後誅淡友的V形走勢之後，目前恒指比上月底21,641點，只得67點進帳。古勝主觀意見相信十二月份，熱錢充裕加上年終基金粉飾窗櫉，恒指重上22,000點機會仲係稍高一點。

中國燃氣（00384）半年賺8.08億元，大增1.16倍，每股盈利18.31仙，派中期息2.2仙，期內營業額升8.3%至85.66億元；管理層透露四至十一月底，公司額外取得15個城市管道燃氣項目，分別位於黑龍江省、湖北省、廣西壯族自治區、甘肅省、江西省及內蒙古自治區。事實上，中燃的中期成績表，收入較大行估計的90億元低，稅前溢利完成市場估計全年49%。

中燃或有消息跟尾

未計投資物業公平值變動、出售附屬公司收益等非營運項目，核心分部收益升12.7%，包括管道燃氣銷售及接駁費收入分別升22%及17.2%，較失望是液化石油氣銷售出現虧損。本月中燃股價累積升兩成七，遠遠拋離其他燃氣股，單從中期成績，古勝看不到春江鴨動食指的動機，會否有其他消息跟尾，或者要大家放長雙眼。

上世紀六七十年代香港，紡織業是經濟重要命脈，時移世易，香港基地，擁有43年歷史的針織巨企福田實業（00420），年初賣給中國中紡，創辦人夏松芳日前辭任執董，見證一代歷史轉變。同時間，第二代本地針織企業互太紡織（01382），上周五出成績表之後，股價連抽多日，打破近半年僵局，也創金融海嘯後新高，昨收報6.26元升0.35元。

數字上，互太半年業績唔算標青，半年賺4.65億元，按年跌33%，不過去年出售附屬有一次性收益，撇除變動後核心溢利實際有1%進帳，加埋中期息15仙，再加特別息25仙，以6.26元半年派息6.38厘，由互太近年把派息比率，由五年前大約50%提升至去年112%，連埋今次業績，管理層願意與小股東分享成果的形象，被投資者進一步確立。尤其過去幾年，優秀的管理令業績避過金融海嘯的洗禮，近19億元淨現金亦令慷慨派送政策的延續性，得到保證，在下認為打算作中長線持有的，現價依然十分吸引。

煤炭股難擺脫弱勢

呢期煤炭股冇運行，主要係需求面仍然疲弱，展望至明年首季，煤價趨勢頂多係平穩發展，異數在乎產量變化能否有助加快去庫進度。昨日中國神華（01088）跌2%、中煤能源（01898）及兗州煤業（01171）同跌逾1%，首鋼資源（00639）更喺被里昂調低評級至「跑輸大市」之下，股價跌近4%。煤炭股喺基本因素未有大改善，以及大行唱淡之下，暫難脫弱勢，就當可以暫時睇少一瓣股份。

古勝