Market Insight：百麗國際走出谷底
香港回歸十五年，經濟轉型未見成果，但港人靠炒炒賣賣維生的伎倆，卻愈來愈爐火純青，特區政府果頭出BSD配合原有的SSD辣招，禁絕炒家沾手住宅市場，轉過頭一眾工廈、寫字樓炒到癲晒，連車位都炒到500萬元一個，上埋CNN國際新聞版，真係唔寫個服字畀班炒家都唔得。
諗落，上星期領匯（00823）除完息，仲可以升到43.1元癲價，唔係完全無道理，當然，唔係講緊長毛在立會法動議，回購最少兩成五股權，古勝相信此舉知易行難，成事機會極微。而係領匯手上嘅182個商場及停車場項目，單計8萬個停車位，即使以天價車位十分一價錢，即50萬元一個，講緊都已經係400億元，足足是領匯954億元市值的四成二，意味剩下的1,100萬平方米的零售商場（剔除街市及車位），平均呎價只係468元。
磚頭癲價領匯熱炒
雖然領匯係房地產信託基金，唔可能出售資產套現，而且撇開頭三十個龍頭項目，好多都係面積同回報較低的商場，但當股市人人望住磚頭癲價開始胡思亂想，已經無人再理領匯股息回報跌到得3.2厘。早幾日古勝先話領匯有買貴無買錯，主要就係見到刻下嘅股市，視領匯為地產股咁樣炒，睇資產價值被低估，這種想法究竟啱定唔啱，只有等歷史話畀我地聽。
但客觀睇，今日通街好息之徒，今年七、八月份，美國房地產信託基金派息唔少跌到3厘樓下，相信領匯遲早會到達差不多的水平，以街外預測一三年每基金單位派息1.43元計，即係47.66元，按近期升勢，或者股東未到聖誕就已經提早收到禮物。
感恩節美國零售商旺丁又旺財，上周五美股得半日市，都要勁升172點，重返萬三點關口樓上，收13,009點。港股隨外圍做好，上周累升755點，惟年晚收爐氣氛相當濃，日均成交得488億元。
同店銷售料可提升
今年IPO嘅重頭戲，中國財險（02328）母公司人保集團（01339）開始招股，執筆時未知定價目標，不過由幾個內地基金經理打聽到，今次定價頗辣，市帳率高於國壽（02628）及平保（02318）。點解財險加埋阿媽手上嘅壽險業務，可以打造出一加一加等於三嘅算式？一切等招股細節，但既然人保自視咁高，或者可以博基金唔直接入飛，索性在街外掃財險，今日大家不妨留意。
百麗國際（01880）困在12至16元之間橫行超過一年時間，上星期見有報道指鞋王有機會失去一兩個品牌的內地代理權，包括意大利Geox，意外是股價反而明顯出現突破，升0.56元，收報15.7元，是近半年新高。經歷上半年同店銷售增長呆滯期，唔少分析員對零售股同店銷售步出谷底的預期愈來愈強（當然，受預付卡生意大減的百貨股例外）。
大摩早前出報告講過，由於一一年百麗第四季同店銷售基數極低，儘管今年第三季得2.8%升幅，但該行估計下半年重返8%以上唔係全無可能。以1,277億元市值計，預期一三年賺57.9億元的百麗，市盈率18.7倍，以未來兩年接近兩成的年增長，尚算合理，而且身為龍頭股，基金往往願意付出溢價，尤其對內需股睇法剛轉向，或者短期有機會上試18至19元水平。
內房股有勢追落後
上周五內房股受追捧，其中中國海外（00688）、越秀地產（00123）、世茂房地產（00813）、合生創展（00754）、綠城中國（03900）等股價均創出五十二周高，真係好耐唔見呢種大場面！若然本周初一線內房股利好氣氛持續，相信其他落後內房股亦會急起直追，可以吼實龍湖地產（00960）以及中海宏洋（00081）；而建材股亦可能被帶動，看官若持有身處淡季嘅水泥股，就要好好把握落車機會！
古勝