成日話「有危先有機」，當經濟轉差，做生意梗係艱難，但搵契機總有方法嘅！新地（00016）旗下新地酒店業務行政總裁鄧力高（Ricco M. deBlank）就話訪港旅客人流依然夠，要愈戰愈強，原來保持新鮮感先係王道。
Ricco同絲絲講，話旗下酒店set up咗創意小組負責新諗頭，喺腦震盪過程誕生嘅鬼主意即使大部分未必work，但總會有一個實行到！其實佢本身都創意滿分，話說以前喺埃及做酒店，因為天口熱，佢就諗到條橋，將浴缸注滿水，雪佢兩日之後將「冰磚」倒番入跳水池散熱。
身邊冇人信行得通，Ricco依然憑住不死嘅探索精神，堅持將巨型冰磚倒入水池，水溫喺15分鐘後仲有31度，搞到個個都忍唔住捧住個肚大笑！不過其實條橋係work嘅，因為嗰日實際熱到有成43度。
要把握酒店泳池商機，Ricco曾經交出新橋，免費幫客人清潔太陽眼鏡，然後先sell客人飲嘢，就係咁成功刺激收入，佢仲試過每日請5個義工，喺泳池邊行嚟行去齋食雪糕。呢份筍工連絲絲都想做！你咁識宣傳，抵你賺啦！
余詩韻