新興市場家陣消費力強勁，就係人都知；當中香港人鍾意買奢侈品，大家只要望吓身邊朋友用緊嗰個銀包或手袋，亦一定感受到；但係最令絲絲意外嘅係，原來香港人喺奢侈品消費方面嘅樂觀程度，竟然係亞太區市場之中排行第一，甚至超越內地同胞！根據萬事達卡調查，75%香港受訪者打算未來一年，維持甚至增加奢侈品使費，真係極度樂觀！
唔單只樂觀，香港人喺奢侈品購買力、購買意欲、同埋擁有奢侈品三大方面，都係亞太區市場三甲。
而每5個香港人，就有1個即興買嘢，不過即興之餘，並無影響香港人嘅精明作風，65%受訪者講明鍾意減價時先買，得15%用正價買。
不過講到實際購買力方面，香港人就唔夠內地同胞咁厲害，內地受訪者未來一年平均打算消費超過4萬元喺奢侈品，而香港受訪者就只打算用3.4萬元，不過，都已經高過亞太區市場嘅平均數2.78萬元好多。
萬事達卡大中華區總裁凌海仲同絲絲講，香港人講求質素同奢華，又有最吸引嘅奢侈品購物體驗，所以對奢侈品消費極為樂觀唔出奇。而香港人最鍾意嘅奢侈品，冇錯，就係設計師品牌時裝同皮具，其次就係名牌手錶同珠寶首飾。至於絲絲最鍾意嘅奢侈品又係乜呢？你估吓。
余詩韻