絲絲講場：新世界籃球賽團結顯拚勁
咁多種球類活動，絲絲認為籃球最講求拚勁同團隊精神，而新世界發展（00017）啱啱舉行嘅籃球聯賽2012總決賽，亦正好體現呢兩種精神。
呢項籃球聯賽已經由六月起開始進行初賽，19隊來自公司唔同部門組成嘅男、女子隊，經過5個多月嘅努力拚搏後，男、女子組總決賽冠軍終於誕生，分別由新世界中國地產同新世界電訊奪得。
絲絲喺現場所見，好睇嘅唔單止落場參賽者嘅球技高水準，就連場邊各部門啦啦隊吶喊助威亦好有聲勢。
陳觀展披甲上陣
而當日，連集團執行董事兼聯席總經理陳觀展同埋其他管理層，都有披甲上陣，嚟咗一場激烈嘅友誼賽。
新世界集團早前推出嘅企業核心價值「UNITI」，五個英文字母分別代表你（You）、新世界（New World）、創新（Innovation）、信任（Trust）、同埋進步（Improvement），寓意新世界大家庭團結一致，喺今次賽事盡顯。
余詩韻