英超聯賽球隊嘅球衣贊助向來都唔愁搵唔到大公司，好似車仔、紅魔鬼曼聯、富豪球隊曼城、兵工廠阿仙奴，佢哋嘅球衣都早有大公司簽晒長約贊助，其他公司想贊助都要排長龍。之不過，昔日有英超Big Four稱號嘅利物浦，呢幾年成績就認真麻麻，今年都係勉勉強強有得打吓歐霸盃，叫做搵番啲收入。但成績一樣咁屎，處身A組打咗四場得六分，勉強叫做排第二，確保出線最好收尾兩場贏晒！英超仲衰，打咗十一周，排第十三位，得個十二分，最近四周三和一負。啱啱上周叫做作客打和車仔，叫做叻番次。
唔怪之得英國報章啱啱爆料，話球隊為免夜長夢多，最近拿拿臨搵球衣嘅贊助商渣打銀行，提前傾續約。絲絲聽講渣打喺○九年用咗八千萬英鎊，即係成九點八四億港元，由一○年起計簽約四年，每年贊助費平均二千萬英鎊，而張約喺一四年就到期。張約嘅條款仲寫明渣打本身係有優先續約權利。家陣張約仲有年幾就到期，利物浦嘅成績離晒譜，難怪佢掉轉頭希望渣打確保會繼續贊助啦！
講真，球隊自從晏菲路嘅主場場館未能成功籌得資金興建新球場後，原本視為係肥仔水嘅場館贊助合約亦冇埋，家陣隊中嘅星級球員得番個烏拉圭哨牙仔蘇亞雷斯，但佢舊年被指種族歧視曼聯嘅艾拉，搞到渣打要發聲明表示失望同關注。
咁何解報道話利物浦高層仍有信心，可以同渣打傾掂張新約？事關渣打建基於亞洲，而英超喺亞洲有龐大嘅球迷，渣打怕且唔會輕易放棄合作嘅！
余詩韻