Market Insight：華保值博率高

雖然本地芬佬賭十八大後有利好政策出台，國指自九月初低位升幅15.7%，反觀內地股民及基金睇法顯然無咁樂觀，滬綜指由低位只有2.8%反彈，到底最終係H股跌番落去陪A股，抑或A股追補H股升浪，十八大之後，大家可以拭目以待。

藍籌添新貴機會大

聽日收市恒指服務公司會進行季度檢討，先唔講暫時49隻藍籌未用晒50隻quota，加入新血可能性相當大。

放大圖片

放大圖片

睇番佔指數比重最小股份（介乎0.19至0.31%），可以用三尖八角去形容，好似澳洲鐵礦石礦收成遙遙無期的中信泰富（00267）、蝕到見骨的中國鋁業（02600）、唔知管理層想點的思捷環球（00330），即使供完股比重會增加番，但前景依然迷茫到極，均有被剔出可能，大行選的熱門包括農行（01288）、昆侖能源（00135）及銀河娛樂（00027），古勝冷選有長建（01038）及兩隻市值過千億的內地券商股。

近期水泥股調整幅度唔細，領袖股安徽海螺（00914）、中國建材（03323）及華潤水泥（01313），分別由早前高位調整12.6%、11.2%及15.5%。事實上，內地剛進入冬天需求淡季，全國水泥價格上周平均升幅僅0.2%，較前周0.8%放緩。

然而，第四季全國水泥價格比八月份低位有兩至三成升幅，水泥股業績應該由上半年谷底中顯著回升，加上明年第二季內地更多基建項目動工，城市建設需求起動，綜合而言，值得逢低收集，較少新產能出現的東部，中建材應是首選，嫌大隻，市帳率最殘的台泥（01136）也可在2至2.1元左右留意。

天時地利造就創科

多得颶風珊迪吹襲美國東岸，帶動修築開支，生產電動工具賣往美洲的創科（00669），近日股價愈升愈有，昨高見15.7元，唔經唔覺返回六年高位。基本因素上，創科北美品牌業務，經多年重整，配合美國樓市復甦，未來兩年業績應可收成正果，現價一三年PE14.4倍，較千禧年後平均17倍折讓一成五，短期展望唔錯，一來多得珊迪，其次北美大型家具零售商Home Depot第三季業績爆燈，管理層上調第四季銷售目標，揸住創科的，短期集天時地利，應可睇高一線。

今浪落後的保險股，踏入十月份初現復甦之曙光，上個月新華保險（01336）保險收入85.5億元人民幣，按年升4.1%，相比起首三季下跌7.7%，雖然坊間對去年最後兩個月，因為比較基數較大，未必能夠維持正增長，但第四季整體充出單位數的保費增長，機會未可抹殺。

今年股價累積跌1.3%，華保仲未返回年初水平，以市場公認的P/EV比較，華保是市面最便宜的內險股，只得0.9倍，同平保（02318）及國壽（02628）的1.2及1.3倍有距離。

或者睇一個月收入，作為入市參考有點衝動，但回顧華保近兩個月，股價兩次逼近50日線即見反彈（目前在24.27元），低位承接力唔錯，而大行也開始轉軚睇番好，過去兩日有高盛、瑞信、渣打及交銀出報告，目標價介乎32至41.44元，均較綜合所有大行目標30.6元高，低估值下，現水平應是贏面大輸面有限。

海信科龍仲係算平

家電股真係長青板塊，昨日又再發力，海信科龍（00921）又再創52周高位2.89元，收報2.87元，升幅達8.3%；創維（00751）及TCL多媒體（01070）同升逾7%，海爾電器（01169）則升2%。上周商務部公布今年十月全國（不包括山東、河南、四川及青島）家電下鄉產品銷售達到791萬台，實現銷售金額213.8億人仔，分別按年增長27及26%，充分顯示國策支持下產業得以保持較快增長。

本來喺家電股之中屬冷門嘅海信科龍，自公布今年首九個月純利大曾逾八成至5.95億人仔後，股價迭創新高，十月中日以來累升幅度達92%。不過，以目前其H股市值13億元，計落估值都仲係算平，嚟緊股價能否繼續放紙鳶，就要睇班芬佬信唔信公司盈利可以繼續保持快速增長。

古勝