舊年榮休嘅滙豐前大班鄭海泉，尋日獲上海實業（00363）委任做獨立非執董、審核委員會主席，同埋薪酬委員會及提名委員會委員，每年獲發嘅董事袍金有23.1萬元。
鄭海泉真係退而不休，除咗擔任滙控行政總裁顧問之外，仲係鷹君集團（00041）、港鐵（00066）、匯賢房託（87001）、中電控股（00002）同埋民生銀行（01988）5間上市公司嘅獨立非執董，平日要睇晒6間公司嘅新聞，分分鐘忙過以前添！
上實嘅公告就話，鄭海泉每年獲發嘅董事袍金有23.1萬元，出任董事會轄下委員會嘅成員總共收取年費19.9萬元。數數手指，上實每年向佢發出嘅袍金同年費就有43萬元。
鄭海泉喺金融界打滾咁多年，累積嘅豐富經驗的確吸引上市公司招手。不過，除咗出任上市公司嘅非執董之外，佢仲有一大籮公職，包括「行政會議成員、立法會議員及政治委任制度官員薪津獨立委員會」嘅主席、公益金名譽副會長、政協委員等，退休後仍不忘為社會出力，直頭係絲絲偶像！