絲絲講場：新地慈善跑勇闖百層樓
新地（00016）西九環球貿易廣場（ICC）嘅「天際100香港觀景台」相信大家都去過，今年就喺ICC搞跑樓梯比賽，將會喺十二月二日星期日舉行，參賽者要由地下跑2,120級樓梯上100樓！絲絲唔少喺ICC返工嘅banker朋友都有參加。
首次移師西九ICC
新地係同公益金合辦「勇闖ICC-100新地公益金慈善跑」，尋日先召集參賽健兒喺天際100觀景台誓師。
活動籌委會主席、新地執行董事兼首席財務總監陳國威（Patrick）話，全球好多地標建築物都舉辦過跑樓梯比賽，例如紐約帝國大廈、台北101等，而今次係首次喺香港最高嘅ICC舉辦，而且參賽名額迅速爆滿。
呢班健兒來頭唔細，包括已拎咗好多國際跑樓梯比賽女子冠軍嘅Melissa Moon、今年紐約帝國大廈跑樓梯國際大賽慈善組冠軍林嘉明、澳門跑樓梯比賽七連冠紀嘉文，仲有「地頭蟲」主辦單位新地隊，同埋贊助機構、租緊ICC嘅瑞信、德銀同摩根士丹利代表。
今次賽制分「個人挑戰賽」同四人一隊「隊際接力賽」兩組，活動所籌善款全數撥捐公益金資助「兒童及青年服務」。其實絲絲為保住小蠻腰，日日都有飯後行樓梯習慣，不過行2,000幾級？就真係要諗諗先，唔知Patrick到時會唔會參加行番幾十層呢？