唔好以為隻隻貨幣都好似港元咁，周不時會出新銀紙，就睇歐元，自從○二年面世後，設計新版一事一直只聞樓梯響，絲絲班收藏家朋友等到頸都長。好彩歐洲央行總算無令大家失望，尋日行長德拉吉就親自出席新銀紙發布會。咦！絲絲留意到，新銀紙嘅水印轉咗用希臘神話頭像，呢排希臘「脫歐」嘈得拆天，咁轉法，唔通內有玄機？
絲絲班friend話，頭像其實係腓利基國王Agenor個女Europa，傳說話Europa美貌，吸引到眾神之王宙斯嘅注意，於是宙斯化身成一頭靚靚嘅白公牛去接近佢，仲誘拐埋佢。
呢個希臘神話，講唔講得上係一個愛情故事？就算用今時今日嘅標準，絲絲都唔識答。不過，好多歐洲文學同藝術品，都以呢個傳說做主題，直頭係經典，甚至歐洲個名「Europe」，亦係源自Europa呢位公主添。
呢一批新歐元鈔票，將會出年五月起發行，首先登場嘅係5歐元，跟住10歐元、20歐元等，甚至500歐元，亦將會陸續流通。
德拉吉本人就無表明新鈔嘅設計有無咩特殊含義，佢就只係話：「乜仲有其他圖像比Europa更適合用嚟做歐元嗰新樣咩？」大家都知道啦，希臘早排就削赤方案搞到要全國公投，萬一遲下真係同歐元區分手講「拜拜」，跟住落嚟嗰十年八載，歐元咪要印住EX嗰樣囉，會唔會睇到眼冤o架？