目前環球處於低息環境，銀紙氾濫，投資者對實物資產需求殷切；Prof. J覺得能夠有優質嘅物業收租及締造穩定現金流嘅公司，應該被睇高一線。
金朝陽（00878）主打物業租賃行業，包括經營物業合併及物業發展等。集團管理層近年最震撼嘅動作，就係出售北角麥連街14至20號地盤，套回一筆資金，主要用來擴展自有勢力範圍，加速完成其他策略性收購項目業權。
集團有着多年豐富收購經驗，強項係充分發揮地積比率。其中焦點項目北角水星街13至15號，若作商業或酒店項目，地積比率最高可達15倍。唔好睇小北角呢區嘅潛力，未來會有多項大型項目發展。集團喺北角仲有兩個地盤，重建後可作住宅項目。如兩個地盤合併發展，樓面面積最高可達29,200平方呎，結合埋水星街項目，集團於北角舊區嘅發展會幾吸引。
另其他地區都有重建項目如大坑可發展為海景住宅物業，亦可加入商業地舖，產生協同效應；而西半山近中環至半山嘅自動扶手電梯，亦有一個地盤非常接近中環金融商業核心地帶，消費力不俗，商務人士及外籍專才對呢類物業情有獨鍾，令集團區內租務回報穩定。加上近年精品豪宅項目銷情又佳，亦可為集團帶來唔錯嘅業績。集團市盈率便宜，只有1.76倍。值得繼續追蹤、出發！
香港大學電子金融服務榮譽助理教授 徐燦傑