前嗰排美國曾經禁止兩間中資電訊設備公司購買喺俄勒岡州4座風力發電場項目，話威脅美國安全，擺明對中資企業築起一道牆。
但美國嘅地方政府未必係咁睇，事關近日就有60幾個中國企業家訪美發掘商機，美國當地商家大獻殷勤，仲請埋前美國總統布殊嚟歡迎呢班中國商家！無他，皆因訪問團袋住超過10億美元嘅籌碼，當然要對佢哋好啲啦！
呢個訪問團係由中國私募公司貔億投資安排，絲絲聽聞，10日行程中，訪問團同超過100間美國企業會面，首先去咗達拉斯睇房地產發展，然後分頭行動：一批人去咗奧蘭多參觀養蝦企業，之後再去威斯康辛州；另一批人就去洛杉磯同俄勒岡州波特蘭，參觀當地嘅葡萄園；然後再喺華盛頓會合。
當中洽談嘅投資金額由幾百萬美元到2.75億美元都有，不過由於訪問團成員好多都未喺海外投資過，所以要多啲時間考慮。
今次嘅中資企業訪美之旅，絲絲睇得出美國好需要中國嘅資金幫手，而內地一啲民企亦因為內地經濟放緩，想去外國賺錢，唔知搞多啲呢類型嘅訪問團係咪真係可以為中美間製造更多商機呢？