絲絲知道，喺投行做雖然人工係高，但代價係要斷六親，過住啲有返工、冇放工嘅日子。而中證監最近仲嫌內地券商「太懶」，要佢哋學吓美國投資銀行高盛班員工做嘢咁搏殺，每日閒閒地至少做足12個鐘！
其實八月嗰陣，國信證券就有位投行部員工突然喺屋企猝死，最惋惜係嗰位員工一畢業就加入國信，捱咗7年，咁就去咗，呢件事令內地開始關注投行員工超長工時嘅問題。
事隔先幾個月，中證監就大讚嗰啲朝早6點返工，夜晚8點仲龍精虎猛工作，去到10點都仲堅守辦公室繼續喪做嘅員工。嘩，朝六晚十，即係成16個鐘，留喺辦公室嘅時間，仲多過喺自己屋企！
但中證監覺得，投行文化係狩獵文化，需要極度活躍嘅員工不斷尋找需求，所以佢哋唔日以繼夜、夜以繼日咁做邊得呀。中證監仲話，券商要認真篩選吓邊啲員工先係人才，其餘唔合適嘅就冇得留低，搞到好多因為熊市而賺少咗嘅券商下定決心裁員節流。
話時話，中證監主席郭樹清就出晒名係勤力主席，據聞郭主席每日都睇吓投資者來信，有時仲會親自批覆，加埋近排去海外路演，仲忙過啲投行人。