絲絲講場：一杯星巴克中國貴七成
歐美經濟放緩，內地銷售嘅外國品牌商品零售價卻貴到離譜，好似內地近日瘋傳嘅美國星巴克咖啡，喺內地一杯咖啡嘅零售價竟比老家美國貴成百分之七十五。
一杯星巴克中杯咖啡價格，喺北京賣二十二元（人民幣‧下同），喺美國紐約折算賣十二點八元、喺三藩市賣十一點一二元、喺德國法蘭克福賣十八點七九元、法國巴黎賣三十二點○五元、英國賣十六點七六元、日本賣二十七點二元等等。睇到咁大差距，內地消費者自然鬼殺咁嘈，紛紛指摘外國品牌係咪當中國人大把錢，於是當佢哋水魚咁撳！
Nike「雙重標準」被罰款
對於外國商品喺內地抬高售價，中國工商部門近日終於出手，以「雙重標準」為由，向美國大型體育用品Nike公司罰款四百八十七萬元，成為內地打壓外國商品抬價，在自己國家賣嘅價錢和內地賣嘅價錢以「雙重標準」定價，損害內地消費者利益。
被罰嘅Nike公司在內地銷售嘅一款型號為Nike Zoom Hyperdunk 二○一一籃球鞋，售價一千二百九十九元嘅高價籃球鞋，而呢款鞋喺美國官網嘅售價則為一百二十五美元（約八百元人民幣），價格提升逾三分之一之多。
絲絲所知，工商部門手頭上仲有份外國品牌商品涉及「雙重標準」嘅黑名單，準備採取行動。隨着外國品牌內地售價抬價不停曝光，好似越野車品牌Jeep啱啱就被指其中一款車款亦貴過美國售價一大截，加埋上述嘅星巴克，睇怕好快就有連場打壓抬價的行動上演！