絲絲講場：QB香港剪夠百萬個頭
日本上市公司JAFCO（集富創投）兩年前，斥資高達100億日圓（約9.7億港元）買下「十分鐘快速剪髮店」QB House（簡稱QB），果然夠眼光。QB嚟咗香港不經不覺已經六年，發展得認真唔錯。JAFCO個名係咪好熟呢？佢咪係同喺日本上市嘅野村證券旗下嘅公司，兩年前向日本ORIX金融手上買咗QB，而JAFCO更被譽為亞洲最佳同日本第一嘅創投公司，全球創投公司則排名第八。
分店網擴至41家
講真，絲絲至今仍未有幫襯過QB，但每當返工或者放工嗰陣，喺東鐵火車站又或者地鐵站，總會見到佢哋嘅店舖，有人喺度排隊等住剪番個靚頭。
QB嘅意思即係「Quick Beauty」，講明10至15分鐘就剪好個靚頭，仲包你滿意，絲絲聽佢哋嘅社長北野先生講，佢哋喺香港剛剛開咗第41間分店，依家遍布港九新界各人流最旺嘅港鐵站同埋大型商場，舖位雖然係精緻啲，通常擺得三張椅子，但勝在效率高，就算周不時喺店外有人要排隊等候，但係最多都係等十五分鐘。
而最新數字顯示，今年香港嘅QB已經服務咗100萬人次嘅香港顧客，當中七成係男性。為咗慶祝呢個佳績，家陣每日頭五十名幫襯嘅客人，都會獲贈一份神秘禮物o架！
余詩韻