絲絲見到依家香港人愈嚟愈忙，連睇報紙嘅時間都無，對社會時事都好似唔多關心。如果有人可以將每篇新聞濃縮到細段啲，咁就算幾忙都可以睇啦！你哋唔好以為絲絲講笑啊，英國真係有人做緊呢樣嘢，仲開發成手機應用程式Summly，尋日正式喺市場推出添！
家住英國溫布頓嘅Nick D'Aloisio前日就過咗十七歲生日，同時亦正式推出自己一手一腳開發嘅應用程式Summly。大家係咪覺得呢位青年人個名好似熟口熟面咁呢！唔使估嘞，佢咪係年前長和系主席李嘉誠旗下嘅創投基金Horizons Ventures睇中嗰位後生仔囉，佢舊年16歲咋，攞咗誠哥嘅30萬美元後，一年後果然兌現承諾，喺佢前日17歲生日，正式推出Summly呢個apps。除咗誠哥之外，唔少名人都成為Nick嘅贊助者，包括荷里活明星Ashton Kutcher、前披頭四成員約翰連儂嘅遺孀大野洋子等等。
Summly透過複雜嘅演算系統，會自動搵出一篇新聞嘅重點，然後濃縮成三段總結，全文介乎三百至五百個英文字詞；睇完總結，用戶有興趣亦可透過網址連結到原文。
雖然呢啲總結都係由電腦程式撰寫，不過Nick就好有信心咁話，Summly比人手寫嘅文章更好，未來仲會一直改進添。絲絲都好佩服Nick年紀輕輕，就開發到一個咁有用嘅apps；難怪佢會被市場捧到同facebook創辦人朱克伯格齊名，即時榮升「第二個朱克伯格」啦。
其實Nick喺兩年前已經開發咗Summly嘅原型，當時下載次數已經高達十五萬次。得到咁多投資者青睞嘅Nick話，相信投資者係睇好Summly先會注資，相信自己嘅年齡並無影響佢哋嘅決定。而為咗研發Summly休學一年嘅佢，就話要盡番學生本分，計劃之後要重返校園完成學業。