買鞋其實唔係女士嘅專利，男士們雖然服飾上冇咁多變化，但依然會追求款式同舒適度。即使Prof. J見到靚鞋都會心思思買番屋企。大家腳得一雙，但擁有嘅鞋絕對唔只一對。利信達（00738）Le Saunda係Prof. J細細個就識得嘅品牌，原來唔經唔覺佢已經有35年。
Prof. J對Le Saunda嘅印象仲停留喺女裝鞋嘅框框，某日見到型男古天樂嘅廣告，原來佢哋依家出埋男裝鞋。不過，今年零售業營商環境挑戰重重，普遍都面對成本控制方面嘅壓力，尤其是香港嘅租金；再加上內地經濟轉弱，影響消費意欲，同業嘅減價戰亦提早展開。要喺一片紅海中抓住屬於自己嘅藍海都唔係咁容易。
集團呢半年作出重新部署，先改善存貨問題，繼而着手提高生意額。咁啱今年聖誕同農曆新年兩個傳統銷售旺季都隔得遠，可望喺冬天試圖清埋嗰60萬對存貨。同時集團會拓展能夠迎合二三線城市嘅產品，同時強化「明星舖」。
做零售最緊要有亮點，品牌形象要清晰。Le Saunda搵我偶像古仔做代言人，Prof. J覺得已經成功咗第一步，起碼已經引起咗消費者嘅注意。但現今消費者係善忘嘅，所以要不斷諗新嘢製造話題，同埋好好運用好hit嘅社交網絡平台。Le Saunda亦透露嚟緊會同一國際級品牌有crossover，Prof. J一於拭目以待，繼續追蹤，出發！
香港大學電子金融服務榮譽助理教授 徐燦傑