絲絲講場：DYNAM公司秘書焗聘幫手
日本彈珠機大王Dynam Japan（06889）發通告，宣布委任聯席公司秘書，接替辭職嘅米畑博文，但新任嘅梅原剛唔符合聯交所上市規則第8.17條及第3.28條規定，所要求擔任上市公司秘書嘅專業資格，於是向聯交所提出豁免，但絲絲察覺，聯交所雖然批准公司可獲得豁免，但就附帶一個有趣條件！
聯交所豁免有條件
Dynam委任嘅梅原剛喺七月時已加入公司，主要負責監督公司同附屬公司內部審核及財務監控，同時亦負責編製公司之財務報表。梅原剛係東京大學經濟學學士，亦係日本公認會計士協會會員，喺日本多間日資同國際機構做過唔同職位，喺財務管理、審核及會計方面有逾19年經驗。
咁嘅資歷你問絲絲就梗係夠，但聯交所嘅上市規則講明就梗係要跟！
講番今次梅原剛之所以獲聯交所網開一面，附帶嘅條件原來係公司會繼續委聘另一名符合聯交所規定嘅現任聯席公司秘書莫明慧，以協助梅原剛履行公司秘書職責。但有趣嘅係梅原剛任職期間公司唔可以解僱呢位香港秘書，否則豁免就即時撤回，即係話梅原剛都要走人！絲絲只有一句，日本人嘅團結精神真係令人佩服，寧願請多一個人，重要嘅職任都係要搵番自己人嘅。