今時今日LED燈相信大家都唔會陌生，除咗基本嘅照明外，經常接觸嘅手機或電腦屏幕亦離唔開LED技術，不過LED產品其實唔止咁簡單，近期專攻LED照明產品嘅真明麗（01868）財務總監陳璋就預期，未來LED能為人類解決糧食問題。
大家都知道蔬果係透過吸收外來光生長，但其實三原色之中嘅綠色光就不能被植物吸收，相比之下LED能夠只發出植物需要嘅藍光同紅光，刺激植物加快生長，而且LED燈發熱少，基本毋須空調設備，同時喺人工環境下亦都唔再需要因為驚昆蟲而使用農藥，喺咁嘅環境下，植物嘅生長效率可以提高至少六成。如果大規模使用成事，相信糧食價格亦都有望受控。
依家世界人口已近七十億，將來人口繼續膨脹下，恐怕再多農地都唔夠用，到時人類嘅食糧可能就要靠晒呢種高效率同省空間嘅植物工廠。