絲絲講場：雙幣股慶功 胡文新做主
本港史上首隻「雙幣雙股」合和公路基建（00737）終於成功出台，締造本港歷史，公司梗要慶祝吓。
絲絲聽聞公司搞嘅慶功宴，胡應湘冇出席，由佢位公子胡文新擔大旗，最特別仲係公司揀喺合和嘅「地頭」灣仔度舉行慶功宴，果然係對灣仔「情有獨鍾」！
灣仔大本營擺幾圍
話說合和公路基建嘅人仔股票今個禮拜一掛牌，當晚佢哋就搞咗個慶功宴，地點並唔係金鐘、中環一帶嘅酒店，而係灣仔海都！係人都知，合和嘅大本營係灣仔，合和中心更係灣仔著名地標之一，今次慶功又喺灣仔，果然係灣仔「忠實粉絲」！
當晚雖然只係筵開幾圍，但有份做個「刁」嘅投行、律師等專業人士都有到齊，好似中銀國際嘅謝湧海都有出席。
中外企業style有別
講開公司嘅上市慶功宴，絲絲聽朋友講，地點其實好睇公司嘅style同作風，好似華資同國企就比較傳統，會鍾意食貴價中菜。
但啲海外公司就鍾意情調多啲，喜歡去啲型格餐廳舉行雞尾酒會，食物質素唔太重視，最重要係有得摸住酒杯底傾計。
絲絲就話，其實去邊都唔緊要，最重要係辛苦籌備上市咗咁耐，公司最後成功掛牌，都係想搵個地方鬆一鬆！
余詩韻