隨着環球推出金融寬鬆政策，Prof. J覺得金融板塊又可以睇高一線，始終金融做嘅生意同錢有關。不過，仍要嚴選優質金融機構，以免被壞帳毒債拖累。友邦保險（01299）帳目清晰，兼有多年信譽，而且保險業務正好吸納游資，潛力不容忽視。
集團嘅亮點在於其增長潛力，友邦嘅新創業務有突破性發展，對股東嚟講十分有利。雖知保險呢行，每隻金融產品都有其獨特性，但能夠創造價值之餘，又令利潤率同時增加，友邦產品設計團隊確係勁揪！
地域多元化亦係穩定增長嘅關鍵，友邦於馬來西亞、中國及新加坡市場喺過去12個月表現良好，而馬來西亞保險市場更屬高增長地區。友邦剛剛收購ING馬來西亞業務，雖然出價唔算抵，但睇番其管理層之前收購嘅往績，相信新收購業務將有明顯改善空間，有助提升每股盈利。而藉着呢次收購，更可以鞏固友邦喺當地嘅市場地位。
雖然集團業務不斷創新、擴張，但成功有賴專屬代理渠道配合，先可為分銷平台打下強厚基石。除個人保險業務外，喺團體保險業務亦深具經驗，係亞太區嘅領先團體保險供應商。友邦喺中小企團體保險計劃市場亦同樣有優勢，皆因與國際僱員福利網絡嘅合作協議，令集團可為跨國企業提供服務和產品。
睇怕友邦透過新業務嘅動力，攻入亞洲區，購併發展將成為主要催化劑。只要好好運用區內嘅龐大保險需求，加上公司固定資產回報嘅帶動，可為業績添上亮點。繼續追蹤、出發！
香港大學電子金融服務榮譽助理教授 徐燦傑