○八年中信泰富（00267）炒燶外匯事件曾經轟動中港兩地，當年主角之一、出任該公司財務部助理董事嘅崔永年，早前因為涉嫌喺事件曝光前偷步沽售中信泰富股份，經已被法庭判處罪成，最終要辭去佢喺雅居樂嘅首席財務官職務，呢個離職消息尋日絲絲獲雅居樂方面證實，而且喺上星期五正式生效添。
絲絲八到，面對兩項內幕交易罪而被起訴嘅崔永年，已經休假一段時間，若果被判無罪就可以復職，一旦罪成，就會安排離職，其實喺佢休假呢段時間，雅居樂就安排plan B，搵咗財務總監雷偉彬做定替補，財務團隊如常工作，公司業務無受影響。
睇番雅居樂一一年嘅年報，崔永年喺一○年加入公司，主要負責會計、企業融資同投資者關係，年報仲有講到因為佢喺○八年違反咗香港證券法律嘅司法訴訟，所以佢喺出任首席財務官時承擔嘅職務有一定限制。