Market Insight：創維科龍 仲係唔貴

其實SSD非新事物，政府只不過將兩年期限延到三年，反而針對非本地永久居民，以及以公司名義購買住宅物業的15%的買家印花稅，俗稱BSD，不少樓市投資者還在揣摩對後市的影響。其實，新加坡在一一年十二月也曾經以BSD，冷卻非戶籍居民投資物業熱潮，把BSD由3%大幅調高到13%，結果是，星洲樓價未見大跌，反而成交則大幅減少。

REITs成資金避風港

措施出台後，按月及按年成交量減少63%及53%，由於一手市場影響較大，地產股價首月跌幅一成，發展商結果把面積較大，吸引海外買家的大型單位，重新訂單縮細面積迎合本地市場，相信這經驗或者可以畀看官們參考。

放大圖片

放大圖片

此外，不少私募基金及房地產信託基金，都有涉足本地住宅投資，15%BSD實施之後，交易成本急升，短期都無機會入貨，消息公布後地產股即大插水，反而揸磚頭的REITs，如領匯（00823）再創上市新高，置富（00778）、冠君產託（02778）都見做好，是否搵有yield磚頭房託基金泊住先？睇嚟機會都唔細。

五隻藍籌地產股拖低大市81點，結算前的港股悶足全日跌34點，收報21,511點，走勢算中規中矩。

中資股的第三季業績繼續有意外驚喜，中石化（00386）首三季賺419.46億元人民幣跌三成，但庫存回撥帶動，第三季業績優於預期，股價升2.8%報8.25元，分析員估第四季煉油及化工復甦持續，但中石化過去一個月累積升14%，唔少利好因素早已反映，可揸但再加注誘因有限。

家電股數據夠靚仔

農行（01288）在較預期低的撥備下，業績優於預測4至5%，股價彈3.1%至3.34元，抵達目標3.3元，四大行中佢仲係最執輸果隻，睇好第四季內銀仲有得升，可繼續揸住等收成。

由月中發盈喜，到首三季業績正式曝光，多賺81%至5.95億元人民幣，海信科龍（00921）愈升愈有，昨日破位升14.6%報2.51元，如果按平均每季賺1.98億元人民幣，7倍市盈率，加埋三四五線城市白家電銷售優於一線的概念支持，家陣仲係唔貴。

講開家電股，創維數碼（00751）今年大力在鄉鎮市場催谷3D多媒體電視，今年三至九月上半年度，高階產品銷售增長達21%，令到唔少分析員都跌晒眼鏡，尤其八、九月份營運數據顯示，內地銷售增長由六、七月一成左右升幅，擴大到兩成七，君可見其股價，也由九月初低位3.04元起步，炒到上星期最高見過4.42元。

以預測全年賺15.42億元，市盈率7.2倍，以未來兩年平均12%增長，估值仲算吸引，如果重返10日線4.12元樓上，確認短期調整完成，可以考慮再上車，上望去年5至5.2元的阻力。

利君累升多忌高追

地產股暫時被廢掉武功，仍留喺魚缸嘅炒家惟有重投中資股懷抱，水泥股昨日幾乎全線報升收市，三大油股亦做好。此外，復星醫藥（02196）今日掛牌，此前醫藥股亦蠢蠢欲動，中國生物製藥（01177）及利君（02005）均逆市升逾3%。講到利君，呢隻股今年初由約0.74元起步，升到上昨日見52周高位2.12元，累升幅度達1.8倍，上個月仲要五送一紅股，揸着佢真係唔使愁，但若然今年二月見佢發盈警落咗車冇追番嘅話，就真係慘情！依家嚟到呢啲位，估值唔再算得上便宜，冇貨底都係做旁觀者為妙。

古勝