孖妹S檔案：炒即日鮮 要睇嬴勢

RC：優勢交易系統大師 張永安（RC）

高妹：你嘅炒賣哲學非常簡單，就係「優勢」兩隻字，仲厲害到收100萬元學費，「一對一」教學生兩小時，學徒的目的就係學識呢套「優勢」。我諗，你真係要解釋吓喇！

RC：最初我同大家一樣，都係散戶一名，贏過錢亦試過一夜之間輸掉50萬美元。後來我發現要長期贏錢，方法就係學懂交易必須要嘅技巧與知識，於是我利用十五年時間，幾乎每天都做投資市場筆記，去觀察市場在不同時段所出現嘅反應，搵出每次交易贏輸嘅原因，再逐一檢討及回顧，慢慢就知道自己對在哪裏，錯在哪裏，並發現原來市場升跌是存在趨勢的。

捕捉趨勢靠記錄觀察

彩兒：咁你係研究邊個市場？散戶可以用咩方法去捕捉其趨勢？

RC：我專炒美國標準普爾期指，近年就開班教人Day Trade（即日鮮）期油、期金、歐元、港期等。其實只要散戶能夠確定「趨勢」、「反趨勢」、「大幅波動市」或者「窄幅波動市」，勝利率就可提升至70%或80%以上。簡單而言，捕捉趨勢嘅方法，就是你要在每分鐘內記錄所有嘅價格與指標，然後反覆觀察，慢慢就會抓到以上四大趨勢之重點，並且發現屬於你嘅Trading Edge（交易優勢）。

回顧測試確保穩定性

高妹：市場數據係死嘅，點觀察呀？

RC：觀察只係第一個步驟，之後你要做的是（a）對數據作出分析＞（b）在資料分析後作出一個假設性邏輯＞（c）做回顧測試和把它應用於真實交易上＞（d）得出穩定結果＞（e）整合成你的Trading Edge和投資策略＞（a）再次回到數據分析。記住，當你無法確定市場趨勢時，獲利是非常困難的。因此你必須不斷重複做 back-test（回顧測試），搵出Trading Edge，提升你獲利嘅能力及機會。

彩兒：咩叫back-test呀？唔明喎！

RC：back-test嘅功能係幫你搵出 Trading Edge。透過十五年嘅觀察，我發現大多數時間NQ（納斯達克指數合約代碼）比ES（標準普爾500指數合約代碼）和DOW（道瓊斯指數合約代碼）嘅移動速度為快，當兩者都處於相同上升方向時，如果NQ突然轉為下跌，大約2至10分鐘後，ES亦會跟隨NQ轉變方向。這就意味NQ引導ES，投資者可利用這1至2分鐘或更長時間按照NQ嘅指示對ES進行交易。

舉例，在NQ市場佔較大比重嘅股份，其波動性影響很大，如科技股交投活躍，會令NQ走勢運行得比ES為快，令我哋可嘗試跟隨NQ變化去交易ES期貨。不過有時NQ會滯後，故投資者要研究，在甚麼情況下NQ唔會引導ES，以避免虧蝕。

透過back-test練習，能從中觀察NQ如何引導ES。不過如果你無上過我嘅堂，就未必知道點做喇？通常我會建議學生先做一年嘅back-test，確定自己能夠捕捉趨勢，先再去實戰買賣。

高妹：仲有乜嘢秘訣?

RC：簡單而言，「優勢」即是利用高勝利概率去捕捉市場正趨勢或者反趨勢，而為保「優勢」穩定及有效，不斷做back-test和forward-test（回顧驗證）是每天都要做嘅功課，同時你亦要緊記呢句黃金格言：「過去的成績並不代表將來的結果。」

張永安（RC）小檔案

現職：職業炒家、投資班導師

學歷：美國休斯頓大學MBA學位

著作：《逆陽之旅》、《致勝優勢》

成就：唯一華人於全球交易系統評核雜誌《Futures Truth》Day Trade標普系統中多次排名第一位，由05年至11年1月共獲得18次榮登榜首位置