成日都話啲八十後即係Y世代懶散，「食嘢唔做嘢，做嘢打爛嘢」，而且份份工做咗幾個月已經厭悶，令到啲老闆頭都大埋。不過，呢個諗法可能要改啦，事關有調查發現，在金融同會計界入面，僱主認為最難招募同挽留嘅唔係Y世代，而係由一九六五年至一九七八年出世嘅X世代至真。
聽完呢份由國際招聘顧問Robert Half公布嘅調查結果，喺接受訪問嘅150名金融公司高層中，分別有49%和48%認為好難挽留到及招聘到X世代僱員。相反八十後代表嘅Y世代，相對而言仲容易啲，分別係39%和38%。絲絲對結果都感同身受，事關X世代僱員最着重晉升機會，85%僱員都視呢個為最重要嘅誘因，而對薪酬回報同生活與工作平衡嘅期望，X世代都比其他世代重視。X世代對工作咁有要求，又難怪佢哋會騎牛搵馬嘅。不過，僱主想留住一班能幹嘅X世代唔係無辦法，只要對員工嘅目標提供多啲支援同培訓，創造機會畀佢哋喺事業上更上一層樓，佢哋又點捨得走。
唔單止咁，公司亦要盡可能提供與同業睇齊，甚至高過行業標準嘅薪酬回報，或者提供一啲額外津貼，先有機會留住佢哋。