SOHO中國（00410）主席潘石屹出名鍾意喺微博爆料，但前日差啲搞出個大頭佛。有「眉精眼企」嘅網民留意到，潘石屹前日係微博爆出，江河幕牆中咗上海SOHO某某項目嘅招標後，江河幕牆嘅股價短短7分鐘坐火箭咁急升2%，由17.61跳到17.93元人民幣，引起網民猜疑，佢哋仲陰陰嘴笑，叫潘石屹小心被中證監請佢去飲茶兼問話。
但咁未算，呢班網民仲抵死到叫潘石屹趁中證監未約佢飲茶之前，有咩想講就好講喇，驚佢去咗就冇機會再講。潘石屹又點會甘心畀班網民揶揄，即時係微博澄清一切純屬巧合，佢仲保證，如果中證監真係因為呢條微博請佢「飲茶」，「我將永遠關閉微博，甚麼話都沒法說了」，潘總做咩咁激動呀？斬手指唔用微博咁大「犧牲」？
其實自郭樹清擔任中證監主席，證監部門就加大力度打擊內幕交易。按照現時規例，上市公司披露重大事項或消息時，應該係停牌先，又或者喺非交易時間進行。潘石屹今次揀正大市正常交易嘅時間爆料，絲絲都覺得今次個timing的確敏感咗少少，話唔定證監部門真係會搵佢傾吓偈。