絲絲講場:普爾遜捐7.8億保育「天堂」公園

外國富豪個個都好有善心,周不時會捐錢做善事,而且數目仲唔少添。好似身家過百億美元嘅「賺錢之神」普爾遜,前幾日就一次過捐咗1億美元(約7.8億港元)畀紐約中央公園保護組織,成為組織創立以嚟收到嘅最大筆捐獻。

今次普爾遜嘅1億美元捐款,足足比之前嘅「紀錄保持者」多咗六倍有多,就連組織負責人收到消息後都話嚇一跳。不過,作為紐約嘅地標,中央公園每年都吸引四千萬遊客參觀,帶動嘅經濟活動收益更高達十億美元。照計中央公園都可以自負盈虧,點解普爾遜仲要捐咁大筆錢呢?

全家與中央公園有緣

絲絲就聽講,喺皇后區長大嘅普爾遜原來同中央公園好有淵源,好似佢嘅祖父母第一次約會就係去中央公園;普爾遜父母就試過推住嬰兒車,帶佢遊花園;甚至而家普爾遜擁有嘅其中一個物業,都係面向中央公園嘅東部。普爾遜就話呢個公園對佢而言就好似「天堂」一樣,所以而家只係出番少少力,保育一吓呢個對佢有別具意義嘅公園咁話。