絲絲講場：銀公馮婉眉 展覽憶童年
銀行公會主席馮婉眉（Anita）平時最多會喺中環呢啲核心金融區出現，尋日竟然去咗荃灣，佢叫絲絲唔好大驚小怪，實質上佢喺荃灣長大，而且銀行公會搞展覽，希望拉近銀行同社區嘅連繫，荃灣係首站，所以見到佢出現囉。
古老錢罌 余偉文都有
Anita同荃灣嘅淵源，原來都好長遠架。原來佢年幼時喺荃灣區長大，讀小學、做第一份暑期工、開第一個銀行戶口，都同呢個地方有關。佢希望呢個展覽日後有機會喺其他地區舉行，方便市民更加了解本港銀行業嘅發展。
銀行唔單只係百業之母，基本上每個香港人同佢哋有不同程度嘅關係。銀行公會搞「銀行伴你．穩步成長」展覽，都係想大家多啲認識呢個行業。
呢個展覽嘅展品都幾有集體回憶feel架，展示咗由唔同銀行借出嘅珍貴展品，以錢罌為例，就有十幾款唔同造型，例如動物、建築物、火車、財神咁，最早可以追溯到六、七十年代，有啲已經成為集體回憶。金管局副總裁余偉文都話，佢自己都擁有其中一款錢罌。
余偉文又話，以前有啲銀行存摺附送優惠券，而且仲可以換錢；有啲銀行提款卡設有使用次數限制，至於可以用幾多次，佢就話要賣關子，建議市民透過呢個展覽自己搵答案。
余詩韻