絲絲講場：石志軍批借貸 學足醫生開刀

睇清客戶 留意抵押

石志軍以前原來曾經係開刀無數嘅外科醫生，遇過嘅病人數以萬計，自從繼承家族嘅典當生意後，輾轉做埋上市公司負責人，佢好嚴肅咁同絲絲講，醫生嘅工作，同審批借貸嘅技術同出一轍，「一個人住進我嘅病房要我開刀，我先看看他會否死喺手術床上，如果會出危險，絕對不會推到手術房，開了刀會害了我嘅名字。」「開刀死掉了」對外科醫生來講係非常忌諱o架！

同樣道理，佢喺批核貸款前亦要睇清楚客人嘅償債能力，留意抵押物嘅價值同性質，如果有老闆以工場做抵押，借100萬人仔，佢會擔心一旦壞帳，工人失業會上街遊行，得到政府保護，自己就唔可以將工廠賣咗套現，反觀辦公室同商舖就未必會有呢啲問題。

佢話記得曾遇到想借錢去澳門賭博嘅客人，當然一口拒絕啦。

風險管理可以話係貸款生意嘅成敗關鍵，佢話，批出嘅貸款價值往往唔高過抵押品一半，客戶仲要先簽定放棄所有抗辯權嘅合約添。去得典當，都預咗會畀貴息喇，好多時係銀行收費嘅幾倍，但好奇怪，佢哋有近四成嘅客係回頭客。