送禮同走後門絕對係中國人根深柢固嘅陋習，金占士早年跑大陸傾生意，睇住廠佬要大包現金人仔加「金勞」送畀內地拍檔或地方官員，賓卡見銀行同大陸老細，亦要送紅包金飾。時移勢易，內地官員依家唔敢咁猖獗收錢，所以近年興起送某名牌手機，但賓卡老友講手機依家都out咗，反而係一種媲美黃金嘅補品仲受歡迎。
金占士本來係問老友，名牌手機出咗新款，依家北上見銀行高層同高官傾生意，係咪要去「升級」一番？點知老友話手機已經唔興，過去幾年有啲高官收手機多到個盒可以當磚砌牆，只要賣咗手頭幾部，就可以買部新款，而且啲高官亦唔太好玩手機，反而高官近年就着重咗健康，於是呢種佳品就好流行。
答案就係價比黃金嘅冬蟲草！金占士不禁問，冬蟲草都係西藏青海等地出產，高官自己都買到啦。
但原來高官佢哋喺內地都好怕假嘢，而香港著名藥行買嘅冬蟲草畀內地人信心保證，所以就好受歡迎，六、七千蚊一両，係同手機價差唔多，估唔到「出口轉內銷」情況亦出現喺藥材。
老友仲話，曾經有高官同公司老總幫佢屋企老人家買藥，要佢幫手喺香港執藥添，而且好多自由行都鍾意喺香港買補品，除咗人仔高，香港嘢點都係信心保證，呢個情況亦解釋到，點解本港知名藥行賣價高過隔籬街坊藥行兩三成，依然咁好生意。
金占士