離開華創（00291）兩年嘅陳樹林有新動向，絲絲八到佢將會出掌中國公共採購（01094）聯席主席一職。陳樹林喺華潤創業期間，進行咗一系列嘅業務重組，仲帶領公司零售業務扭虧轉盈，所以加盟中採嘅消息傳出之後，以前投資過華創嘅機構投資者即時敲門話想見吓公司管理層。
陳樹林履歷的確令人眼前一亮，北京外國語言學院英文系畢業，出任過中國駐澳洲使館商務外交官，八四至八八年任職外經貿部，即係依家嘅商務部。
絲絲據聞，美國前總統老布殊八十年代尾訪華期間，陳樹林就負責過即時翻譯，佢嘅語文能力真喺頂呱呱！
佢加入華創之後，絲絲至認識佢，喺任內完成咗一係列重組，例如出售華潤置地（01109）、華潤燃氣（01193）同埋華人銀行控股權呢啲非核心業務，專注發展核心消費品業務，買入百貨公司同輕紡業務。經過多年打拚佢喺○九年退休。
依家陳樹林重出江湖加盟中採，連埋榮譽主席何偉剛，同埋另一位聯席主席程遠忠，全公司有三個主席，確係人才濟濟！唔知陳樹林趕唔趕得切，參加下個月初嘅2012全球公共採購論壇呢？