絲絲講場：稅貸點玩問「貸神」
各大銀行嚟緊嘅戰場，會係稅貸，有「貸神」之稱嘅冼國林，最睇得通稅貸蹺妙，根據佢嘅經驗，借稅貸嘅人，會一借再借，唔一定係冇錢交稅，反而借嚟做投資更好，佢自己都有借稅貸，話用嚟買個車位都有着數！
銀行留客長做長有
以前見得佢最多嘅時間，就係稅貸出籠之時，絲絲改佢花名「貸神」一啲都冇誇張，皆因係佢將稅貸發揚光大，搞出好多花臣，令人覺得借錢交稅冇乜罪惡感。依家佢係第一信用（08215）主席，主業係私人貸款。
間間銀行都爭相推出稅貸，佢認為係為咗獲得強大嘅客戶資料庫，用嚟做交叉銷售，佢嘅經驗係，「客戶幫襯你借得一次就有第二次、第三次，日後仲會申請信用卡、借錢買樓等。」
低息借錢用嚟投資
稅貸個市場真係好大，因為大多數人未必會為咗交稅而預先儲蓄，而係收到稅單先識頭痕，到時咪惟有去銀行借錢囉！但係愈嚟愈多人借低息稅貸，再作其他高息投資，呢啲咪叫生財有道囉！
絲絲見依家啲稅貸息率好吸引，「貸神」話以往利率為2厘時，稅貸利率約3.75厘，依家可謂零利率，稅貸利率約1.38厘，尚算合理。不過唔係個個入去借都攞到咁低息，要自己慢慢秤喇！
余詩韻