絲絲講場：14拳手爭大鱷搏擊之王
對沖基金搏擊之夜（Hedge Fund Fight Nite）今個月尾進行決賽，幾經激戰後只剩低14名強手，絲絲搵咗佢哋，睇吓集訓進度，見佢哋個個咁紮實，場決賽一定好精彩。
其中三位選手靜雞雞話畀絲絲聽，佢哋係第一次玩，之前冇接觸過拳擊，只係訓練咗五個月左右就膽粗粗參賽。
而作為較少數嘅女將之一，Operation Smile嘅Danielle話鍾意boxing夠挑戰性同埋係國際運動，唔係單純靠強壯、夠大隻就贏到，比賽過程都要諗清楚每一步要做啲乜嘢，一定要做到智勇兼備。咁講法似乎同喺商場傾生意或者做買賣都有異曲同工之妙喎！
猛男參賽順便keep fit
勢估唔到，男士們有時比我哋班姊妹仲貪靚，在場兩位猛男National Australia Bank嘅Adam同Astbury Marsden嘅Mark都話，好開心打boxing之餘仲可keep fit，Adam又特別提到，佢哥哥之前都參加過，戰績唔錯，搞到佢都心思思玩埋一份。
Mark就話好享受期間識到好多朋友，仲話訓練嗰陣以拳王阿里做模仿對象添。講到致勝秘訣，佢哋不約而同話，梗係打中人多過畀人打！