《富爸爸．窮爸爸》呢本教人理財嘅書幾乎冇人唔識，作者Robert T. Kiyosaki（清崎）憑住一系列嘅相關書籍，賺賺埋埋嘅版稅應該夠佢幾世用，點知忽然話佢申請破產，莫非佢「能醫不治醫」？原來佢係想避開官司敗訴嘅賠款，索性將公司摺埋，呢招算唔算係理財之道呢？
話說Kiyosaki喺未成名之前，一直都同The Learning Annex合作，The Annex負責提供平台畀Kiyosaki演講同宣傳佢啲書，而且佢哋都協議咗The Annex會得到1%嘅回報。點知因財失義，Kiyosaki唔認數，惟有法庭見喇！
舊年法院裁定Kiyosaki間公司Rich Global Company要賠2,400萬美元畀The Annex，之後Kiyosaki間公司就申請破產保護。
雖然2,400萬美元唔係一個細數目，但明眼人都知，Kiyosaki啲書咁暢銷，仲出咗11本咁多，佢嘅財力又點止咁少呀，就連《福布斯》都估佢淨資產總值有8,000萬美元。其實今次申請破產嘅只係佢旗下11間公司入面其中一間，Kiyosaki一蚊都唔使喺自己啲財產度拎出黎，今次都可以話係策略性破產。
《富爸爸．窮爸爸》描寫作者自己生於一個中產家庭，佢老竇（窮爸爸）雖然受過良好教育，但每月仍要為繳付帳單而煩惱，佢老友嘅阿爸（富爸爸）讀得書少，但生活十分富裕。本書將兩位爸爸嘅性格、思想、行為比較，從而指出造成貧富差異嘅原因。