用動作多多形容港交所（00388）真係無錯，推出唔同改善市場結構性嘅措施（雖有空間反應麻麻哋），又東征西伐，成功收購倫敦金屬交易所（LME），為內地開放金融市場作全方位準備。但「北水南調」仲未公布時間表，而LME盈利貢獻又要等三年先至可以浮現，港交所短期都要面對唔少壓力。
作為香港唯一大賭枱，Prof. J就唔擔心佢無生意做，不過呢排IPO市場靜靜似是湖水、QE3刺激大成交效果又無以為繼，加上預期阿爺嘅經濟放緩等不明朗因素，港交所短期增長動力成疑。再加上要發可換股債券（CB）來應付收購LME資金需要，令到佢負債比率一下子由「零」水平上升至40%，大行報告間間都唱淡隻港交所，當真四面楚歌。
今次港交所歷史性發債，其中有一半投資者來自對沖基金，透過長短打嘅方法與正股套戥（arbitrage）獲利，操作方法就係同時認購CB同沽售正股。獲利基礎令到投資咗港交所CB班對沖基金大佬鎖定咗回報，但Prof. J就覺得既然CB換股價可以定喺160元，而認購反應亦屬超額認購，不妨食多番小小補健產品，以160元為五年中線目標價，繼續好有誠意咁守望你！
除咗欠缺短期正面刺激，同時港交所亦面對成本上漲壓力。如果要維持一向偏低嘅成本收益比率，都幾困難。因為收購LME時承諾過要維持現有100多人嘅團隊，唔炒得。要養住咁多員工，真係要好好諗吓點樣開源節流。繼續追蹤，出發！
香港大學電子金融服務榮譽助理教授 徐燦傑