聽講可口可樂傾緊以1,000萬美金入股音樂網站Spotify，見到Spotify呢個名係咪熟口熟面呢？咪就係幾年前超人李嘉誠入股嗰間囉！繼facebook（fb）之後，睇嚟超人喺投資科技股方面，往往能夠早着先機。
其實可口可樂一直同Spotify合作緊，希望喺向年輕顧客宣傳方面另闢渠道，結果喺前年世界盃合作打造嘅大會主題曲《Wavin' Flag》大受歡迎，喺至少17個國家登上當地iTunes嘅第一位。可口可樂今年四月同Spotify傾掂，邀請後者加盟佢哋嘅互聯網marketing部門。
消息透露，從五月嗰轉集資推算，Spotify估值多達40億美元，更打算游說高盛入股。Spotify上年集資嗰陣，已吸引fb早期投資者DST Global同埋Accel Partners，仲有創投公司Kleiner Perkins投資。
話口未完，Spotify啱啱同三星電子傾好單deal，Spotify訂戶可以喺三星嘅電視機直接收聽串流音樂，Spotify希望藉此鼓勵消費者由免費模式改為接受訂購服務。