絲絲估聽日香港會繼續幾好陽光，但十年後嘅今日呢？話估到你都唔好信啦。好多嘢估短期就得，長線真係好難睇，創立樓價指數Case-Shiller Index嘅Robert Shiller（席勒），話睇樓價就同幫阿仔改名嘅道理一樣，你只係以為估到將來嘅事。
30年前佢第一個仔出世，一心諗住幫佢改個比較特別，少啲人用嘅名，就諗到佢爸爸個名Benjamin，但點知佢囝囝有個同班幼稚園同學都係叫Benjamin。自此，佢就發現呢個名其實好common，仲愈來愈多人用。
根據年代最流行BB名排名，Benjamin呢個名由1960年代第130位，升到去1980年代嘅31位，而嚟到千禧年更加排喺25位。Robert仲話Benjamin呢個名喺佢哋圈子仲異常地流行添！
講完呢件事，Robert再次強調，要確定同估計樓市周期係十分困難，同幫個仔改名一樣咁唔簡單，而且佢又話唔明點解啲人會有咁大期望同改變得咁突然。既然連耶魯大學經濟學家Robert都話難，絲絲以後睇啲「估計」報告，都係唔好信得咁足。