絲絲講場：張忠謀趕時間揀搭鐵路
搭火車，搭地鐵返工返學係大部分香港人日日都會做嘅事，一啲都唔出奇，不過絲絲尋日睇報紙，竟然有人因為搭集體運輸鐵路而上報紙，佢就係台積電董事長張忠謀。
乘客唔識半導體之父
張忠謀另一個身份係「台灣半導體教父」，大有錢佬，何解有私家車唔坐，改搭集體運輸鐵路？話說張忠謀早幾日要參加公司股東會，但因為路面交通擠塞而遲到，搞到非常之尷尬，佢後來知道由科學園區，搭電聯車到高鐵新竹站只需要兩、三分鐘，所以唔鍾意遲到嘅佢，就改用平民方式，搭公共運輸工具。
除咗搭鐵路避遲到，張忠謀為咗近返工，仲已經搬到新竹高鐵站附近，可謂為咗唔遲到而出盡所有法寶。
講番張相，其實係一個乘客拍嘅，仲上載咗去Facebook，即刻引嚟大批台灣民眾討論，而呢件事亦喺尋日嘅台灣報章顯著版面見報。最搞笑係張忠謀隔籬坐咗位「頭耷耷」掛住睇書嘅女仔，明顯係唔知坐喺隔籬嗰位係乜水，網民當然好多嘢講，話呢位少女如果識得趁機請教吓張忠謀，好過揸住本書喺度讀喇！