置地係中環大地主之一，傳聞佢哋以150億元洽售歷山大廈，點知「彭大班」話公司政策唔對謠言作回應，但見絲絲問得懇切，就兜個大圈暗寸謠言無稽，仲表示公司仍然以香港為基地，每年一次籌款活動「鼠戰中環」就係最好例證。
彭耀佳唔評論謠言，但就話可以一齊「討論吓」幾間投資銀行為置地撰寫嘅研究報告，入面嘅分析就講到，歷山大廈位處置地物業群嘅中間，置地一早就用天橋連接晒旗下唔同大廈嘅商場，而置地又啱啱為唔同商場做翻新，將各大廈嘅商場都統一叫做「LANDMARK」，所以賣走歷山大廈就等於破壞呢個連貫性，唔合理。
佢仲向絲絲表明心迹，話置地「南征北伐」，喺內地、新加坡、越南、菲律賓等地不斷起樓，但由始至終，個心都擺喺香港。
好似嚟緊星期日舉行嘅鼠戰中環，起點咁啱就係歷山大廈對出，呢項舉辦咗6年嘅「特色競跑」賽事，所籌得嘅錢好多都用喺香港嘅精神健康慈善活動，算係置地對香港嘅一點心意咁話喎。
何解叫「鼠」戰呢？彭耀佳就話，當中有幽默嘅一面，英文「Rat Race」其實係話打工仔為生活，每日重複做同樣嘅工作，情況就好似白老鼠喺籠入面不斷重複跑圈一樣。佢話，中環就好似一個大老鼠籠，辦鼠戰中環，其實都係畀打工仔發洩一番。今個星期日就係咯，大家又有冇興趣去發洩呢？
余詩韻