受到A股復市拖累及歐洲股市急挫，恒指昨日下跌187點，主板成交433億元。上周五恒牛街貨減少1.36億份，總數跌至35.77億份，熊證單日增加9,215萬份，總數為20.95億份。雖然牛證總街貨多出超過14億份，但補倉量反映好友不是太進取，熊證被劏後未立時補貨，差距因而拉闊而矣。
昨日即市高低位相差174點，波幅唔算大，但牛熊證成交活躍，錄得50.77億元，按日升35%，窩輪成交有64.85億元，按日增9%，佔比升至27%，人氣不俗。
本地地產股調整，零售股又因為十‧一黃金周的訪港旅客數字增幅遜預期而急挫，有睇頭的個別出口股又累升唔少，買得落手的股份唔係咁多。其中可以睇的是近期講緊要加價的兩電，電能實業（00006）在海難之後，股價無咩受壓，而中電（00002）於九月至今一直穩中有升。
香港早前被選為全亞太區最佳數據中心之地，打敗最強對手新加坡，排在全球第七位，包括蘋果公司、Google將在香港設數據中心。隨着科技發展，雲端普及，數據儲存的需求只會愈來愈多，電力消耗亦將直線上升。
據外國媒體的非正式研究，全球互聯網資料中心的用電功率相當於30個核電站的供電供率，可小注電能Call。電能美林Call（17287）今年十二月十日到期，行使價65.01元，實際槓桿15倍。
Handsome哥