西班牙經濟有幾差係人都知，偏偏有一個人睇唔到，而且佢唔係普通人，係西班牙財政部長德金多斯（Luis de Guindos），佢仲當住好多經濟達人面前話「西班牙完全不需要紓困」，你話係咪畀佢激到唔知好嬲定好笑。
話說佢尋日喺倫敦經濟學院（LSE）演講，鬼死咁認真爆咗一句「西班牙完全不需要紓困」，令在場嘅經濟專家聽到打咗個凸，唔使幾秒鐘，大家定一定神，個個即刻笑到標眼淚，就連佢自己個翻譯都忍唔到笑。如果絲絲喺現場，肯定笑到肚痛！
德金多斯話，西班牙嘅一連串經濟改革措施，加埋歐洲央行嘅購債計劃，就足以救番起西班牙經濟，西班牙根本就唔係大家口中所講咁無用，等緊歐盟嘅全面紓困救命。佢仲話，接受歐央行公開貨幣交易（OMT）嘅買債計劃，唔等於西班牙接受全面紓困。其實央行透過公開貨幣交易計劃買西班牙嘅國債，都係間接少少咁幫西班牙解決財困，絲絲真係睇唔出兩者有咩分別喎。話唔埋，佢都係為咗西班牙面子至咁講，又或者係佢自欺欺人嘅行為。