科技界正掀起緊一股南移風潮！美國城市聖克拉拉（Santa Clara）同帕洛阿爾托（Palo Alto）一直係硅谷高層集中地，但近排情況有變，愈黎愈多硅谷投資者開始喺洛杉磯置業，而且仲特別鍾情海邊嘅單位。
今年一月，Paypal聯合創辦人兼Facebook投資者蒂爾（Peter Thiel），就花咗大約1,150萬美元（約8,970萬港元），喺洛杉磯日落大道，買咗間6,000平方呎嘅海邊大屋。
同樣係Facebook要員，市場拓展主管Matt Jackson就買咗間曼哈頓海灘嘅現代豪宅。
甲骨文公司（Oracle）創辦人埃利森亦都不遑多讓，啱啱買咗間價值3,700萬美元（約2.8億港元）嘅複式單位，係佢個人喺馬利布市嘅第27個物業！創立網絡電話公司Ooma嘅Andrew Frame亦用550萬美元，買咗歌手Nick Lachey間靚屋。
點解咁多I.T.界紅人搬家？有經紀話，近幾年超過六百間剛起步嘅科網公司落戶洛杉磯，於是愈聚愈多相關嘅專才，遲啲會有更多行政人員進駐添，所以呢區租金都愈嚟愈貴。