絲絲講場:台灣人債改名掀熱潮

中國大陸同台灣喺八月簽署兩岸貨幣清算協議之後,意味企業日後可以直接喺台灣發行離岸人民幣債券,為台灣帶嚟新商機。依家業界除咗密切關注第一隻人債幾時發行,另一個大家都關心嘅話題,就係諗下為呢隻債券改咩名好喇。

金占士聽聞,台灣業界嘅建議,有小籠包債、珍珠奶茶債、蘭花債等,都係台灣出名嘅食物或者特產。亦有人建議取名阿里山債,貪佢聽起上嚟威風些少。券商澳盛亦湊熱鬧,建議以台東嘅旅遊景點為名,取名太魯閣債。

點心債稱號具通用性

其實,依家喺香港經常聽到嘅點心債,已經泛指喺中國大陸境外發行嘅離岸人民幣債券,所以無論係喺香港、倫敦、新加坡發行嘅人債,一般都通稱點心債。其實台灣亦可用同一個名,如果要改個新名,就要睇巿場將來係咪接受喇。

債券嘅命名一般會揀當地最具代表性嘅事物,如喺中國發行嘅人債叫熊貓債,喺日本發行嘅日圓債叫武士債,澳洲嘅澳元債叫袋鼠債,美國嘅美元債叫洋基債,韓國嘅韓寰債叫泡菜債咁。

金占士