港交所（00388）上市推廣部主管藍博文（Eric Landheer）傳出辭職，絲絲亦向港交所發言人證實咗，但唔會評論藍博文辭職嘅原因同去向。市場有指，港交所今年嘅IPO可能創近10年最差紀錄，或者因而影響到藍博文嘅去留。不過有投行老友同絲絲講，「雙幣雙股」都可能係原因之一，無論乜嘢原因都好，投行界就覺得佢辭職都幾突然。
老友話，藍博文早兩個月仲拖住成team人，去各大小投行游說做「雙幣雙股」IPO，表現得好積極，但係被問到技術問題，好似港元轉人民幣流程，同證監會配合監管問題，藍博文就只能夠推番個波畀上市科，所以當時都係一句「研究研究」就算。
港交所CEO李小加早喺去年四月提出「雙幣雙股」，仲揚言希望舊年底成功，點知拖到依家都未成事，反而畀新加坡後來居上，下月出雙幣雙股嘅Dynasty REIT，都幾無face。
投行老友就好唏噓咁話，其實都唔怪得港交所同藍博文，因為依家市況差，成堆重磅股爭住喺未來兩三個月抽水，而「雙幣雙股」必須經證監會嗰關，而證監會就對港元同人仔之間嘅股價套戥風險非常嚴謹，怕會拖慢上市進度而寧願放棄。
藍博文走咗之後，佢嘅副手Rebacca Smith會接手做署理主管，繼續做上市推廣同發行人關係業務。
余詩韻